Gitun- an sa Malacañang ang sugyot nga ibalik ang death penalty alang sa mga dagkong drug traffickers sa Pilipinas. Sumala kang Palace Press Officer Claire Castro, wala pa’y pinal nga baroganan si Presidente Ferdinand “Bongbong” Marcos Jr. bahin sa maong hisgutanan samtang padayon pa nga gitan-aw ang tanang anggulo ug posibleng epekto niini sa nasud.
Ang maong lakang naggikan sa pagpadayag ni Interior Secretary Jonvic Remulla og suporta sa pagpabalik sa silot kamatayon alang sa mga dagkong sindikato sa droga, apan gipahinumdoman sa Palasyo nga kinahanglang tan-awon pag-ayo ang posibleng epekto niini sa internasyonal nga relasyon ug kooperasyon sa Pilipinas sa ubang mga estado.
Bisan wala pa’y pinal nga desisyon kon paboran ba ang death penalty, gipahimug-atan sa Palasyo nga gimandoan na sa Presidente ang tanang ahensiya sa pagpatuman sa balaod nga palig-onon ug pahugtan pa ang kampanya batok sa ilegal nga droga.
Gimandoan usab ang mga awtoridad nga gub-on ang mga drug networks sa nasud ug sigurohon nga papanubagon ug mabilanggo ang tanang nalambigit sa pagpayuhot niini nga nagpadayon sa pagguba sa kinabuhi sa mga Pilipino.
Photo courtesy: The Holly Spirit
