Miabot na sa Pilipinas niadtong Lunes sa buntag ang unang batch nga gilangkuban sa 34 ka Overseas Filipino Workers (OFWs) nga gipapauli gikan sa Saudi Arabia human sa pagkabalda sa mga biyahe sa eroplano. Kini human sa mga pag-atake sa King Khalid International Airport sa Riyadh nga giangkon sa grupong Houthi.
Matud sa Overseas Workers Welfare Administration (OWWA), miabot ang mga OFW sa Ninoy Aquino International Airport Terminal 3 sakay sa Qatar Airways flight gikan sa Doha, human mobiyahe gikan sa Al Qassim, Saudi Arabia.
Gihatagan sila sa OWWA og tabang sa airport, transportasyon ug temporaryong kapuy-an, lakip ang domestic flight assistance alang sa mga mopauli sa ilang tagsa-tagsa ka probinsya. Dugang sa OWWA, gikoordinar na usab sa Department of Migrant Workers ug sa Philippine Embassy ang sunod nga mga flight aron matabangan ang ubang OFW nga naghulat nga makapauli.
Gilauman usab nga laing 65 ka OFW ang moabot karong Martes, lakip ang 50 ka trabahante gikan sa Al Qassim ug 15 ka babayeng OFW nga giatiman sa Bahay Kalinga sa Dammam.
Photo courtesy: Wikipedia
