Gipalig-on sa Department of Education (DepEd) ug Department of the Interior and Local Government (DILG) ang siguridad sa mga pampublikong eskwelahan sa tibuok nasud pinaagi sa pagpakatap og mga barangay tanod ug pagpahigayon og unified 911 emergency system.
Naglangkob kini sa gipirmahang joint memorandum circular niadtong Oktubre 14 nga gipangulohan ni Education Secretary Sonny Angara ug Interior Secretary Jonvic Remulla. Ubos sa maong kasabutan, makapangayo na og tabang ang mga tunghaan sa ilang lokal nga barangay aron mag-deploy og mga tanod sa sulod ug palibot sa eskwelahan. Hinuon, gipatin-aw sa DepEd nga dili pulihan sa mga tanod ang mga kapolisan, ug ipailalom gihapon sila sa oryentasyon bahin sa child protection ug katungod sa mga estudyante.
Dugang pa niini, ikonektar usab ang DepEd sa pambansang 911 emergency hotline sa DILG kauban ang NGA Philippines aron dungan nga makadawat og report ang Philippine National Police (PNP) ug ang DepEd kon aduna’y mga insidente sa kagubot o emerhensya. Pinaagi niini, gilauman nga mas paspas ang pagresponde sa mga awtoridad ug mapadali ang proseso sa pag-beripika sa mga taho nga kaniadto moabot og pila ka semana ngadto na lang sa pito ka adlaw o usa ka adlaw.
Photo courtesy: DepEd/ NGA Philippines
