Nakapalgang wala na’y kinabuhi ang 42-anyos nga security guard nga taga-Arakan, North Cotabato sa sulod sa iyang kwarto sa Alcovar Farm, Purok 3, Barangay Dalwangan, Malaybalay City, niadtong Sabado sa buntag, Oktubre 17, 2026.
Nakadawat og tawag ang Malaybalay City Police Station (CPS) gikan sa Kapitan sa maong barangay mga alas 11:30 sa buntag, ug sa ilang pag-abot sa lugar, nakit-an ang biktima nga naghigda sa duyan ug natabonan sa habol iyang lawas.
Base sa imbestigasyon, katapusang nakit-an nga buhi ang biktima mga alas 11:00 sa gabii niadtong Biyernes, Oktubre 16, human sa iyang duty isip guard. Pagkasunod buntag, nabalaka ang iyang mga kauban tungod kay wala na kini mogawas sa iyang bunkhouse, hinungdan nga giablihan kini sa iyang Security Guard Supervisor ug mga kaubanan diin didto nadiskobrehan ang iyang patay’ng lawas.
Sumala sa mga kauban, ang biktima namatikdang nag-antos sa mga sintomas sa taas nga presyon sa dugo (high blood pressure). Walay nakit-ang timailhan sa foul play sa dapit ug gituohang cardiac arrest ang posibleng hinungdan sa iyang pagkamatay, diin opisyal kining gideklarang dead on arrival sa Bukidnon Provincial Medical Center ug gihatud purenarya samtang nagpadayon ang imbestigasyon sa kapolisan.
Photo courtesy: Malaybalay City Police Station
