Gipirmahan sa lokal nga panggamhanan sa Manolo Fortich, Department of Environment and Natural Resources (DENR) Region 10, ug pito ka *partner stakeholders* ang usa ka Memorandum of Agreement (MOA) ug Memorandum of Understanding (MOU) aron mapalig-on ang pagpanalipod ug pagdumala sa kinaiyahan sa lungsod.
Gipahigayon ang maong makasaysayanong pagpirma niadtong Oktubre 14, 2026, sa Conference Room sa New Government Center sa Manolo Fortich. Pinaagi sa MOA, tumong sa LGU ug DENR-10 nga ma-update ang ilang *Forest Land Use Plan* (FLUP) aron mas mapalambo pa ang pagdumala ug pagpanalipod sa mga kalasangan ug kabukiran sa lungsod.
Samtang pinaagi sa MOU, ipatuman usab ang “Tayo ang Kalikasan” River Bio-Corridor Project. Ubos niini, gitahasan ang pito ka kapartner nga mga organisasyon ug kompanya sa pagpananom ug pag-atiman sa mga kahoy daplin sa mga suba ug sapa sa mga giilang lugar. Lakip sa mga nipartisipar mao ang 52nd Engineer Brigade sa Philippine Army, Innovation Community Base Responsive Education Project, Aqua de Oro, Vital OPC, Kalugmanan National High School, Bounty Plus, ug Gamma Foods Corporation.
Ang maong inisyatibo naglantaw sa pagpalambo sa kalidad sa tubig, pagpanalipod sa ekolohiya, ug paghimo og luwas nga puy-anan alang sa mga ihalas nga mananap sa dapit.
Photo courtesy: LGU Manolo Fortich
