Gipasidunggan sa Provincial Government of Bukidnon ang 59 ka mga nag-retiro nga empleyado sa pangagamhanang probinsyal pinaagi sa gipasiugdahan nga “Paalam, Salamat Program: A Tribute to our Retired Employees” niadtong Oktubre 16, 2026 sa Bukidnon Sports Complex Amphitheatre, Malaybalay City, Bukidnon.
Ang maong programa gipahigayon pinaagi sa PGB’s Program on Awards and Incentives for Service Excellence (PRAISE) Committee, nga gipasayon sa Provincial Human Resource and Management Office uban sa Provincial Government Employees Union of Bukidnon (PGEUB). Giila dinhi ang mga nahimong bililhong kontribusyon ug dedikasyon sa mga retirees sulod sa daghang katuigan sa ilang pag-alagad sa katawhan sa Bukidnon.
Sa mensahe ni Governor Rogelio Neil P. Roque, gipadayag niya nga ang pagretiro dili katapusan sa serbisyo kundi sinugdanan sa usa ka bag-ong kapitulo kon diin aduna na silay higayon sa paghatag og panahon sa ilang kaugalingon ug sa ilang pamilya.
Dugang pa niya, ang tinuod nga sukod sa serbisyo publiko dili kon unsa ka dugay giokupar ang posisyon, kundi kung pila ka kinabuhi ang nahimong mas maayo tungod sa ilang pag-alagad.
Photo courtesy: LGU – Bukidnon
