Opisyal nang gisugdan sa lokal nga kagamhanan sa General Luna, Surigao del Norte, ang pagtukod sa bag-ong Social Service Center pinaagi sa pagpahigayon og groundbreaking ceremony niadtong nakalabay nga adlaw.
Gipangulohan ang maong kalihokan ni Mayor Johnson Y. Sajulga ug Vice Mayor Romina Rusillon-Sajulga, kauban ang mga miyembro sa Sangguniang Bayan, mga representante sa nagkalain-laing ahensya sa gobyerno, mga hepe sa departamento ug uban pang stakeholders.
Tumong sa proyekto nga mas mapalig-on ug mapadali ang paghatag sa mga importanteng serbisyo sa publiko, ilabina sa pagtubag sa mga panginahanglanon sa komunidad.
Giplano usab nga gamiton sa maong pasilidad ang fire-resistant design aron mapalambo ang kaluwasan sa gambalay batok sa peligro sa sunog. Gilauman nga pinaagi sa maong proyekto, mas mapauswag ang serbisyo publiko ug mapalig-on ang pag-atiman sa lokal nga kagamhanan sa kaayohan sa katawhan sa General Luna.
Photo courtesy: LGU General Luna, Siargao, Surigao del Norte
