Nagpahimangno ang Police Regional Office 11 (PRO 11) sa publiko batok sa mga ilegal nga tigpahulam og kwarta o gitawag nga loan sharks, ilabina karong panahon nga posibleng modaghan ang manginahanglan og dugang pinansyal nga suporta.
Pinaagi sa gipagawas nga anti-criminality tips, giawhag sa kapulisan ang publiko nga mag-amping sa pagpangutang ug likayan ang mga pautang nga adunay sobra kataas nga interes, walay klarong kasulatan, ug naggamit og hulga o pagpanghadlok aron makasingil sa nangutang.
Gipasabot nga ang mga ilegal nga tigpahulam mahimong mopahimulos sa kalisod sa pinansyal sa usa ka tawo pinaagi sa pagpugos kaniya nga mangutang pag-usab aron matubag ang nagkadakong obligasyon.
Aron malikayan ang pagpanglimbong ug dugang nga problema sa utang, gitambagan ang publiko nga susihon una ang lehitimo ug awtorisasyon sa tigpahulam, basahon pag-ayo ang mga kondisyon sa pagpangutang, ug likayan ang mga transaksiyon nga walay tukmang dokumentasyon.
Girekomenda usab ang paggamit sa mas luwas nga alternatibo sama sa SSS, GSIS, Pag-IBIG Fund, mga rehistradong kooperatiba, bangko, salary loan gikan sa employer, ug mga programa sa tabang pinansyal sa lokal nga kagamhanan ug mga ahensiya sa gobyerno.
Samtang, giawhag ang mga nabiktima o gihulga sa mga ilegal nga tigpahulam nga mangayo og tabang sa kapulisan ug dili magduhaduha sa pagreport sa mga insidente.
Photo Courtesy: PRO11
