Arestado sa mga personahe sa Tagbina Municipal Police Station (MPS) ang giilang Top 1 Most Wanted Person sa lebel sa munisipyo niadtong nakalabay nga adlaw, sa may alas-1:50 sa hapon sa Purok 4, Barangay Sta. Maria, Tagbina, Surigao del Sur.
Gipahigayon ang maong operasyon sa Tracker Team sa maong estasyon ubos sa pagpanguna ni PCMS Erwin B. Manticahon ug pagdumala ni PCPT Mark Steven Y. Sarsonas, ang Acting Chief of Police sa Tagbina MPS. Ang dinakpan, kinsa usa ka babaye nga residente sa maong barangay, nasikop pinasikad sa warrant of arrest alang sa kasong Grave Oral Defamation ubos sa Criminal Case No. 5007-T.
Ang maong kamanduan sa pagdakop giisyu niadtong Oktubre 15, 2026, sa Acting Presiding Judge sa Municipal Circuit Trial Court, 11th Judicial Region, Hinatuan-Tagbina, Surigao del Sur. Nga adunay girekomendang pyansa nga nagkantidad og ₱18,000.00 alang sa iyang temporaryong kagawasan.
Atol sa pag-aresto, gipahibalo ang suspetsado sa iyang mga katungod ubos sa Batakang Balaod, ingon man ang mga probisyon sa Anti-Torture Act. Gigamitan usab ang maong operasyon og Alternative Recording Device subay sa gimando sa balaod ug legal nga pamaagi.
P hoto courtesy:Tagbina Mps
