Sikop sa mga otoridad ang 18 ka mga wanted person, lakip ang pito nga giila nga “most wanted,” atol sa sunod-sunod nga operasyon sa tibuok rehiyon sa Caraga niadtong nakalabay nga adlaw.
Sumala sa report ni Police Brigadier General Rolindo M. Suguilon, Regional Director sa Police Regional Office (PRO) 13, gilunsad ang maong operasyon aron masiguro ang kahapsay ug kalinaw sa rehiyon. Ang Butuan City Police Office ang nakatala sa labing daghang dinakpan nga miabot sa unom ka indibidwal. Samtang tag-tulo ang nadakpan sa mga probinsyal nga buhatan sa kapulisan sa Surigao del Norte, Agusan del Norte, ug Agusan del Sur. Ang Dinagat Islands PPO nakadakop og duha, ug usa ang nasikop sa Surigao del Sur PPO.
Usa sa mga nag-unang nadakpan mao ang suspetsado nga giila sa alyas nga “Jong-jong” didto sa Libjo, Dinagat Islands. Siya ang giila nga number two most wanted person sa probinsya tungod sa kasong statutory rape. Hiniusang pwersa sa Libjo Municipal Police Station, Provincial Intelligence Unit sa Dinagat Islands, ug Regional Intelligence Unit 13 ang nagpahigayon sa iyang pagkaaresto.
Gipahayag ni usab ni PBGen Suguilon nga ang mas gipakusog nga operasyon sa PRO 13 nga nagtumong sa pagpanalipod sa mga lungsoranon batok sa hulga sa kriminalidad. Gipasalig usab niya nga magpabiling lig-on ang PNP Caraga sa pagpatuman sa seguridad ug kalinaw sa rehiyon.
photo courtesy:Police Regional Office 13
