Gidawat sa Lokal nga Panggamhanan sa San Miguel ang ayuda nga nagkantidad ug ₱266,900.00 gikan sa Department of Science and Technology (DOST)-Caraga alang sa pagpatuman sa “Project Smarter FARM.”
Tumong sa maong proyekto nga iduso ang mas moderno ug maalamong pamaagi sa pagpanguma pinaagi sa siyensya, teknolohiya, ug inobasyon. Kini aron mas mapalambo ang sektor sa agrikultura ug mapalig-on ang panginabuhian sa mga lokal nga mag-uuma sa nasangpit nga lungsod.
Personal nga nanguna sa pagdawat sa pundo si Municipal Mayor Michael T. Corilla. Mitambong usab sa kalihokan silang DOST-Surigao del Sur Provincial Director Ramil Sanchez, Project Coordinator Engr. Jan Lumancas, ug Engr. Freidyjoy Darato nga nagsilbing Focal Person sa Municipal Agriculture’s Office.
Kini nga inisyatiba kabahin sa mga prayoridad nga programa sa kasamtangang administrasyon nga nagtutok sa paghatag ug suporta sa mga mag-uuma alang sa kinatibuk-ang kalamboan sa San Miguel.
Photo courtesy:Mayor Michael T. Corilla
