Nagpahigayon og Greyhound Operation ug drug testing ang Panabo City District Jail (PCDJ) niadtong Oktubre 15, 2026, uban sa pakigtambayayong sa Philippine Drug Enforcement Agency (PDEA)-Davao del Norte, Provincial Health Office, City Anti-Drug Abuse Council (CADAC) sa Panabo City, ug Panabo City Police Station.
Gipangulohan ang kalihokan ni District Jail Warden JSUPT Erwin B. Esden. Tumong sa operasyon nga mapalig-on ang seguridad sulod sa prisohan ug mapugngan ang pagsulod ug presensya sa mga gidili nga droga ug kontrabando. Pinaagi sa regular nga inspeksiyon ug drug testing, gipalig-on usab ang disiplina ug pagkamabinantayon sa mga personnel ug mga Persons Deprived of Liberty o PDL.
Gipasiugda sa PCDJ ang kamahinungdanon sa panagtambayayong sa nagkadaiyang ahensiya sa pagpatuman sa kampanya batok sa ilegal nga droga ug pagmintinar sa kalinaw ug kahapsay sulod sa pasilidad. Gipasalig usab sa prisohan nga magpadayon ang mga lakang aron mapanalipdan ang seguridad ug mapadayon ang usa ka luwas ug drug-free nga palibot alang sa tanan.
Photo Courtesy: BJMP ROXI Panabo City District Jail
