Giawhag sa City Traffic Management Office kun CTMO ang mga drayber sa kulorom nga kompletohon na ang ilang mga dokumento aron malikayan ang paglapas sa balaod ug mga ordinansa sa dakbayan.
Sa pakighinabi sa Juander Radyo Mati Team, gibutyag ni Ret. PCAPT Bernard M. Bumatay, OIC sa CTMO, nga hugot ang ilang pagpatuman sa OPLAN PAPA isip kabahin sa kampanya sa lokal nga panggamhanan alang sa pagpalig-on sa disiplina sa dalan ug pagsiguro nga motuman ang mga drayber sa balaod trapiko.
Samtang gipaklaro usab ni Bumatay nga walay taga Mati sa kapin 50 ka mga drayber nga naisyuhan nila og citation ticket, diin ang tanang naisyuhan og citation ticket gikan sa ubang mga munisipyo.
Kalabot niini, gidasig usab ni Bumatay ang tanang personahe sa CTMO nga magpadayon sa matinud-anong pagserbisyo, magpakita og propesyonalismo sa pagtuman sa ilang mga katungdanan, ug patas nga ipatuman ang balaod alang sa kaluwasan ug kahapsay sa tanan.
