Niabot sa 193 ka residente ang nakabenepisyo sa libreng serbisyong medikal ubos sa PuroKalusugan Program sa lungsod sa Montevista, Davao de Oro, nga nagpadayon sa paghatod og serbisyo panglawas ngadto sa nagkadaiyang barangay.
Base sa natala nga datos, 67 ang natabangan sa Barangay Lebanon, 25 sa Purok 2 sa Barangay New Cebulan, 63 sa Barangay New Dalaguete, ug 38 sa Barangay New Visayas Montevista Davao De Oro.
Lakip sa mga serbisyong gihatag ang konsultasyon, pagmonitor sa vital signs, pag-apod-apod sa tambal, random blood sugar screening, bakuna, health information ug home visitation alang sa mga pasyenteng dili na makabangon sa higdaanan.
Lakip usab sa programa ang PhilPEN ug maintenance medications. Gipatuman ang maong programa ubos sa administrasyon ni Mayor Cyrex Labrador Basalo, RN, pinaagi sa pagdumala ni Municipal Health Officer Dr. Robert P. Sulilap, aron mas mapaduol ang serbisyo panglawas sa mga residente sa matag barangay.
