Hapit na madugta ang patayng lawas sa usa ka babaye dihang napalgan sa Pulangi River, Purok 1, Indalasa, Malaybalay City niadtong Oktubre 19, 2026. Giila sa ginikanan ang biktima nga 20-anyos taga-Purok 2, La Fortuna, Impasug-ong kinsa namissing sukad pa niadtong hapon sa Oktubre 16 dihang nananghid kini sa iyang 30-anyos nga live-in partner nga manguha ug lanzones tabok sa Pulangi River apan wala na kini makabalik pa sa ilang puluy-anan.
Base sa taho sa kapolisan, giingong adunay speech ug language impairment o kapansanan sa pagpakigsulti ug pagdungog ang biktima diin gituohang wala kini nakadungog sa pagkusog ug pag-abot sa tubag-baha samtang nagtabok sa sapa nga maoy hinungdan sa iyang pagkalumos.
Wala nakitang foul play sa maong trahedya hinungdan nga nagdumili na ang pamilya nga ipa-autopsy ang patay’ng lawas ug giandam iyang kapahulayan. Apan nagpadayon gihapon ang gimando nga masusing imbestigasyon sa Malaybalay CPS aron masiguro ang tanang detalye sa maong panghitabo.
Photo courtesy: Malaybalay City Police Station
