Nahimong trahedya ang biyahe sa lima ka empleyado sa Del Monte Philippines, Inc. human gideklarang Dead on Arrival (DOA) ang duha ka babayeng pasahero dihang nahagbong sa spillway padulong sa suba ang usa ka pasaheroang jeep sa Sitio Cable, barangay Nangka, Libona, Bukidnon niadtong Oktubre 17, 2026, pasado alas-4:30 sa hapon.
Naila ang mga namatay nga nag-edad og 34 anyos ug 37 anyos samtang giatiman sa Northern Mindanao Medical Center Provincial Hospital sa Cagayan de Oro City.
Subay sa imbestigasyon sa Libona MPS, nagbiyahe ang jeep (KVJ 352) nga gimanehoan sa usa ka 63-anyos gikan sa barangay Nangka padulong sa Baungon dihang nawad-an kini og kontrol samtang naglawig sa lugsongon nga dalan human nag-overtake sa nag-una nga sakyanan.
Sumala pa wala na nabawi sa driver ang sakyanan pabalik sa hustong linya hinungdan nga nabangga kini sa konkretong barikada ug sa usa ka nakaparada nga Bajaj motorcycle sa wala nag hingpit nahagbong sa spillway. Kasamtangang gitanggong na sa Libona MPS ang driver sa jeep alang sa haom nga disposisyon ug pagpasaka og kaso.
Photo courtesy: Libona Municipal Police Station
