Gipasalig sa Department of Budget and Management (DBM) ang padayong suporta sa mga programa alang sa pagkat-on sa mga estudyante, lakip na ang Academic Recovery and Accessible Learning (ARAL) Program sa Department of Education (DepEd).
Matud sa DBM ubos sa pagpangulo ni Acting Secretary Kim Robert De Leon, prayoridad sa gobyerno ang pagpadali sa pagpatuman sa ARAL Program samtang nagpadayon ang deliberasyon sa gisugyot nga 2027 national budget.
Ubos sa gisugyot nga National Expenditure Program (NEP) alang sa 2027, mokabat sa P975.963 bilyon ang alokasyon alang sa DepEd, ang kinadak-ang pondo taliwala sa tanang departamento sa gobyerno.
Bisan walay lahi nga budget line item alang sa ARAL, giklaro sa DBM nga mahimo gihapon kining pondohan pinaagi sa kasamtangang mga programa ug kalihokan sa DepEd, subay sa mga lagda.
Sa 2026 General Appropriations Act, mikabat sa P8.936 bilyon ang kinatibuk-ang pondo nga gigahin alang sa ARAL gikan sa nagkalain-laing programa sa DepEd.
Photo courtesy: DBM
