Nabalaka ang Department of Education o DepEd Region Nine sa posibleng epekto sa panghitabo sa El Niño sa pagkat-on sa mga tinun-an sa tibuok rehiyon.
Matud ni DEPED 9 Regional Director Ronelo Al K.Firmo, kon adunay ang grabeng kainit sa panahon mahimong makaapekto sa kahimtang sa mga tinun-an kay posible nga magpatuman na usab ug mga suspension sa mga klase.
Segun ni RD Firmo, posibleng maapektuhan ang kapasidad sa mga estudyante nga maka concentrate sa ilang mga leksyon, ilabina kon mosaka ang temperatura sulod sa mga classroom.
Posible usab nga mag-atubang og mga hagit ang mga eskwelahan tungod sa kakulang sa tubig ug sa dili komportableng palibot nga mahimong makaapekto sa kahimsog ug partisipasyon sa mga tinun-an sa klase.
Tungod niini, gikinahanglan ang tukmang pagpangandam ug koordinasyon sa mga eskwelahan, mga ginikanan ug lokal nga panggamhanan aron masiguro ang kaluwasan sa mga estudyante ug mapadayon ang ilang pagkat-on.
Segun ni RD Firmo, importante nga sundon ang mga pahimangno sa mga may kalabotang ahensya ug ang mga giya sa DepEd alang sa pagdumala sa klase panahon sa grabeng kainit.
