Nadakpan sa kapulisan ang usa ka 58-anyos nga lalaki human gipusil ug nasamdan ang iyang 57-anyos nga manghod nga lalaki sa Barangay Maragang, Tigbao, Zamboanga del Sur, alas 5:00 sa hapon niadtong Oktubre 19, 2026.
Base sa inisyal nga imbestigasyon sa Tigbao Municipal Police Station, naglalis una ang managsoon nga miresulta sa pagkuha sa suspetsado sa usa ka improvised 12-gauge shotgun ug gipusil ang biktima sa dughan.
Namatikdan usab sa kapulisan nga nakainom og ilimnong makahubog ang managsoon sa wala pa mahitabo ang insidente. Gidala ang biktima sa Zamboanga del Sur Provincial Medical Center sa Pagadian City alang sa pagpatambal, samtang nadakpan usab ang suspetsado sa kapulisan ug narecover ang armas nga gigamit sa suspetsado.
Apan sa karon nagpabilin pa sa Tigbao Rural Health Unit ang suspetsado alang sa medical observation tungod sa taas nga presyon sa dugo ug gideklarang dili pa angay nga ipriso base sa rekomendasyon sa doktor.
Personal nga kasuko ang gituohang motibo sa pagpamusil, samtang nagpadayon ang imbestigasyon sa kapulisan aron matino ang tibuok panghitabo.
Photo courtesy:ZSPPO-PIO
