Naggahin na og pondo ang lokal nga panggamhanan sa Talakag, Bukidnon alang sa pormal nga pagpatuman sa impounding operations o pagdakop ug pag-atiman sa mga iro nga naglatagaw sa kadalanan.
Kini ang gipamatud-an ni Mayor Renz Sulatan atol sa iyang live broadcast sa social media agi’g tubag sa mga reklamo ug kabalaka sa publiko.
Matud sa Mayor, tumong sa programa nga malikayan ang mga aksidente sa kadalanan, ilabina sa mga motorista ug lumalabay. Pagadumalahon kini sa buhatan sa Municipal Agriculture Office, uban kang Doctor Dano sa Rural Health Unit (RHU), ug sa technical working group, diin nagpahigayon usab sila og benchmarking sa mga pasilidad sa Davao ug General Santos City. samtang giandam pa ang imprastraktura ug mga proseso.
Samtang wala pa masugdi ang operasyon, gihangyo ni Mayor Sulatan ang kooperasyon sa mga tag-iya sa iro ug dog lovers nga higpitan ug bantayan ang ilang mga binuhi aron masiguro ang kaluwasan sa komunidad.
Photo courtesy: Mayor Renz Sulatan
