Nadakpan sa hiniusang buy-bust operation nga gipahigayon sa mga personnel sa Governor Generoso Municipal Police Station (GOVGEN MPS) isip lead unit, kauban ang Provincial Drug Enforcement Unit (PDEU), Provincial Special Operations Group (PSOG), ug Provincial Intelligence Unit (PIU), nga ubos sa Davao Oriental Police Provincial Office (DOPPO), sa Barangay Tibanban, Governor Generoso, Davao Oriental, ang usa ka suspek sa gidudahang kalihokan sa ilegal nga droga nga nailhan sa alyas nga “Jun.”
Ang suspek giingong nalambigit sa paglapas sa Republic Act No. 9165 kun Comprehensive Dangerous Drugs Act of 2002. Narekober atol sa operasyon ang unom (6) ka sachet sa gidudahang shabu nga may gibana-banang gibug-aton nga tulo (3) ka gramo ug gibanabana nga kantidad nga ₱20,400.00.
Lakip usab sa mga nakumpiskar ang usa ka plastik nga sudlanan, itom nga belt bag, ug ang gigamit nga buy-bust money isip kabahin sa ebidensiya sa operasyon. Sa pagkakaron, anaa na sa kustodiya sa kapulisan ang suspek ug ang tanang nakumpiskar nga mga butang alang sa hustong proseso ug disposisyon subay sa balaod.
Padayon ang DOPPO ug ang mga kaubang yunit sa pagpatuman sa mga operasyon batok sa ilegal nga droga aron mapalambo ang kalinaw, kahusay, ug kaluwasan sa mga komunidad sa Davao Oriental.
Photo courtesy: Gov Gen MPS
