Nangayo og dugang pundo ug suporta gikan sa mga senador ug nagkadaiyang nasudnong ahensiya si Isabel Mayor Bennet Pongos aron mapadali ang pagpatuman sa mga programa ug proyekto alang sa kalamboan sa lungsod.
Kabahin kini sa padayong paningkamot sa lokal nga kagamhanan sa Isabel nga mapalapdan ang suporta sa nasudnong kagamhanan, dugang sa tabang nga gihatag ni Congressman Richard Gomez.
Kauban ni Mayor Pongos sa maong mga pagbisita sila si Sangguniang Bayan Member Allan Romero, kanhi Bise Mayor ug karon PESO Head BJ Alcantara, Executive Assistant James Raymond Pongos, ug Legal Officer Atty. John Raphael Caracuel.
Lakip sa ilang gibisita ang mga opisina nila Senador Loren Legarda, Senador Lito Lapid, Senador JV Ejercito ug Senador Kiko Pangilinan aron mangayo og suporta alang sa mga proyekto nga nagtumong sa pagpauswag sa imprastraktura, pagpalig-on sa serbisyo publiko ug paghatag og dugang oportunidad sa mga residente.
Gikonsulta usab sa delegasyon ang Government Service Insurance System (GSIS) kalabot sa kahimtang sa mga insurance claim sa mga kabtangan sa lokal nga kagamhanan nga nadaot tungod sa Bagyong Tino. Tumong niini nga masubay ang pagproseso sa mga claim ug mapadali ang pag-angkon sa angay nga benepisyo sa lokal nga kagamhanan.
Giduaw usab nila ang Philippine Sports Commission (PSC) aron mangayo og dugang suporta alang sa mga programa ug proyekto sa sports sa Isabel, ilabi na sa pagpalambo sa talento ug abilidad sa mga atleta ug kabatan-onan.
Pinaagi sa maong mga lakang, gitinguha sa lokal nga kagamhanan sa Isabel nga mapalig-on ang koordinasyon sa mga nasudnong ahensiya ug makadani og dugang suporta alang sa mga proyekto nga makahatag og kaayohan ug malungtarong kalamboan sa mga Isabelanon.
