Way lusot sa awtoridad ang usa ka Barangay kagawad nga giila sa alyas “Aldo,” residente sa Barugo, Leyte, giingong usa ka bag-ong nalista nga drug personality human makit-an sa mga pulis ang gidudahang shabu atol sa checkpoint sa Barangay Cayare, San Miguel, Leyte, niadtong nakalabay nga adlaw.
Base sa report sa Police Regional Office 8 (PRO-8), gipasikad sa mga personnel sa San Miguel Municipal Police Station (MPS), ubos sa pagpangulo ni PLT Tyron Jayson S. Labordo, ang pagpahunong kaniya tungod sa pagmaneho og motorsiklo nga walay helmet. Sa dihang gipakita sa suspek ang iyang lisensya sa pagmaneho, nahulog sa yuta ang usa ka heat-sealed plastic sachet nga adunay gidudahang shabu.
Narekober gikan sa suspek ang duha ka heat-sealed transparent plastic sachet nga adunay gidudahang shabu, nga may gibana-banang gibug-aton nga 0.48 gramos ug gibanabanang kantidad nga ₱3,264. Gidala ang suspek ug ang mga narekober nga ebidensiya sa San Miguel MPS alang sa hustong dokumentasyon ug pagproseso sa pagpasaka sa angay nga kaso kalabot sa paglapas sa Republic Act No. 9165 o Comprehensive Dangerous Drugs Act of 2002.
Gidayeg ni PRO-8 Regional Director PBGen Romano V. Cardiño ang mga operatiba tungod sa ilang pagbantay ug gipasiugda ang papel sa mga checkpoint sa pagdiskobre sa ilegal nga mga kalihokan ug pagpanalipod sa kaluwasan sa publiko.
Photo courtesy: PRO 8
