Mokabat sa 300 ka mga scholars sa Zamboanga del Sur Provincial Government College (ZDSPGC) ang mopailawom sa Organic Agriculture Production NC II Training. Kini human gilusad sa TESDA-Zamboanga del Sur, kauban sa Provincial Government ug sa ZDSPGC ang Training Induction Program sa Subanen Hall, Provincial Government Complex sa Barangay Dao, Pagadian City, ning bag-o.
Ang mga scholars gikan sa 15 ka campuses sa ZDSPGC sa tibuok lalawigan ug gipondohan ang ilang pagbansay ilalom sa Training for Work Scholarship Program (TWSP). Lakip sa ilang makat-onan ang Basic Financial Literacy, pagtrabaho sa gender-diverse environment, ug pagpahibalo bahin sa mga may kalabotang balaod.
Sumala ni Governor Divina Grace C. Yu, ang mga organic fertilizer nga himuon sa mga trainees atol sa pagbansay ipang-apod-apod sa ngadto sa mga local farmers. Pinaagi niini, gilauman nga mapalig-on ang kahibalo ug kasinatian sa mga scholars, ingon man ang malungtarong pagpanguma ug seguridad sa pagkaon sa Zamboanga del Sur.
