Gibuhian balik ngadto sa dagat ang 87 ka Olive Ridley sea turtle hatchlings sa Barangay Tabon, Jose Dalman, Zamboanga del Norte niadtong nakalabay nga adlaw. Gipangulohan sa mga personnel sa Community Environment and Natural Resources Office o CENRO Manukan ang maong pagpagawas, uban ni Barangay Captain Lucio R. Caresosa, Barangay Councilor Nixson Campos ug mga residente sa lugar.
Ang mga pawikan gikan sa 112 ka itlog nga gibantayan ug gibalhin sa mas habog nga dapit aron malikayan ang posibleng kadaot. Sa maong gidaghanon, 87 ang malampusong napusa ug gipabalik sa ilang natural nga puy-anan.
Gipasiugda sa kalihokan ang dakong papel sa mga opisyal sa barangay ug mga residente sa pagpanalipod sa mga pawikan ug sa ilang mga dapit nga pangitlugan.
Padayon usab ang panag-alayon sa CENRO Manukan ug sa mga lokal nga komunidad aron mapanalipdan ang mga pawikan ug ilang mga nesting habitat sa kabaybayonan.
Photo courtesy: DENR Zamboanga Peninsula
