Nadakpan sa kapulisan ang usa ka lalaki human gi-hot pursuit tungod sa giingong pagpabuto og armas sa Purok Lanton, Barangay Apopong, General Santos City, alas 6:00 sa buntag niadtong Nobyembre 11, 2026. Giila ang nadakpan sa alyas nga Jeboy.
Sumala sa report sa Police Station 2, mitubag ang mga kapulisan sa sumbong bahin sa pagpabuto og armas nga walay pili sa maong lugar. Gilunsad dayon ang paggukod nga misangpot sa pagkadakop sa suspek. Narekober usab sa operasyon ang usa ka kalibre .45 nga pistola ug mga bala niini.
Gawas sa posibleng kasong ipasaka batok sa suspek, mahimo usab siyang atubangon og dugang nga reklamo tungod sa pagkadaot sa mga kabtangan, human makapasa og pormal nga sumbong ang ubang posibleng biktima.
Gipangunahan ang operasyon sa mga personahe sa Police Station 2, CMFC SWAT, 1201st Maneuver Company ug 43rd Special Action Company.
