Nadakpan sa kapulisan ang usa ka 20-anyos nga giila nga high-value individual (HVI) atol sa pagpatuman sa search warrant sa iyang pinuy-anan sa Sitio Toning Part 1, Barangay Lagao, General Santos City, alas 4:48 sa kaadlawon niadtong Nobyembre 10, 2026. Giila ang dinakpan sa alyas nga “Faz,” usa ka construction worker ug residente sa maong lugar.
Gipahigayon ang operasyon sa koordinasyon sa 1201st Maneuver Company sa Regional Mobile Force Battalion 12, diin gipresentar usab ang mga gikinahanglang saksi atol sa pagpangita, lakip ang suspek, usa ka barangay kagawad ug representante sa media.
Narekober sa operasyon ang lima ka sachet sa gituohang shabu nga adunay kinatibuk-ang gibug-aton nga 7.5 gramos ug gibanabanang kantidad nga 51 mil pesos. Nasakmit usab ang duha ka improvised tooter nga adunay mga timailhan sa gituohang shabu, usa ka itom nga pouch ug lima ka buhing bala sa .22-caliber nga armas.
Gidala na sa Police Station 3 ang dinakpan alang sa dokumentasyon ug hustong disposisyon. Gisumite usab sa Regional Forensic Unit 12 ang mga nakumpiskang gituohang ilegal nga droga alang sa laboratory examination.
Giandam na ang mga kasong may kalabotan sa paglapas sa Republic Act 10591 o Comprehensive Firearms and Ammunition Regulation Act ug Sections 11 ug 12 sa Republic Act 9165 o Comprehensive Dangerous Drugs Act of 2002, nga ipasaka pinaagi sa inquest proceedings.
Photo courtesy: PRO 12
