Nagpahigayon ang City Disaster Risk Reduction and Management Office (CDRRMO) sa Valencia City og mga bag-ong lakang aron mapalambo ang sayong pagpasidaan sa posibles nga pagbaha, pinaagi sa pagbutang og weather station, text blast system, ug water level monitoring station sa pakigtambayayong sa organisasyong People in Need.
Sa eksklusibong pakighinabi sa Juander Radyo Malaybalay kang CDRRMO Head June Ray Valero, naghatag usab ang People in Need og training sa paghimo og contingency plan, lakip ang mga gamit nga gipondohan sa gobyerno sa United Kingdom.
Pinaagi sa water level monitoring station, masubay na sa opisina ang pagsaka sa tubig sa Panlibatuhan River pinaagi sa dashboard aron paspas nga makapahibalo sa mga komunidad nga posibleng maapektuhan, ilabi na subay sa leksyon sa insidente niadtong Setyembre 17, 2025.
Dugang pa ni Valero, ang weather station nga gibutang sa opisina sa CDRRMO makasukod sa kusog sa ulan, hangin, atmospheric pressure, ug humidity. Ang mga datos gikan niini gamiton nga basihan sa pagpagawas og mga advisory ngadto sa mga barangay aron mas tukma ug dali ang pagpasidaan sa mga residente.
Photo courtesy: CDRRMO Valencia City
