Andam na ang lokal nga panggamhanan sa Ipil nga hatagan og kahayag ug kasadya ang mga residente pinaagi sa selebrasyon sa Paskong Ipileño 2026 nga pormal nga sugdan sa Nobyembre 27, 2026.
Kabahin sa Grand Opening ang ceremonial lighting sa mga Christmas lights nga maghatag og mas nindot ug mas madasigon nga dekorasyon sa lungsod, lakip na ang mga espesyal nga pasundayag gikan sa Chocolate Factory, The Excell ug DJ Iyenn Marchan.
Pormal usab nga ablihan niining adlawa ang Ipil Christmas Night Market diin gilauman nga daghang lokal nga negosyante ang makapahimulos sa oportunidad nga ipaila ug ibaligya ang ilang mga produkto. Mobalik usab ang Christmas Carnival aron dugangan ang kalipay ug kalingawan sa mga pamilyang motambong.
Pagasundan kini sa usa ka fireworks display isip pagpasiugda sa pagsugod sa kapaskuhan. Pinaagi niini, giawhag ang tanan nga maghiusa sa pagsaulog sa Pasko pinaagi sa gugma, panag-uban, pagpaambit sa kalipay ug pagsuporta sa lokal nga komunidad.
