Gipailalom karon sa 30-day quarantine ug health monitoring sa Del Monte Feed Lot sa Bukidnon ang 1,119 ka ulo sa nagmabdos nga gatasang baka gikan sa Australia. Tumong sa maong lakang nga mapataas ang lokal nga produksyon sa gatas ug mapalambo ang panginabuhian sa mga mag-uuma sa nasud.
Ang maong mga baka kabahin sa kinatibuk-ang 1,419 ka heads nga miabot sa Port of Cagayan de Oro niadtong Oktubre 18, 2026. Personal nga gitan-aw ni National Dairy Authority (NDA) Administrator Atty. Marcus Antonius T. Andaya ang kahimtang sa mga hayop sa pasilidad sa Bukidnon niadtong Nobyembre 5 alang sa herd development program sa gobyerno.
Gilauman sa NDA nga ang maon mga baka ug ang ilang mahimong anak makadugang og hangtod 2,527 ka baka nga makahimo og 5.9 ka milyong litro sa gatas sa tuig 2027—nga mokabat sa 20 porsyento sa target nga produksyon sa gatas sa nasud.
Sumala pa ni Andaya, ang maong resumption sa pag-import human sa halos tulo ka tuig maghatag og oportunidad sa mga kwalipikadong mag-uuma ug kooperatiba nga makadawat og kalidad nga baka aron mapalapdan ang ilang herd ug mapadako ang ilang kita.
Photo courtesy: National Dairy Authority
