Gipahimangnoan sa Department of Labor and Employment (DOLE) ang tanang pribadong kompanya nga sundon ang mga lagda sa tukmang pagkwenta ug paghatag sa 13th month pay sa ilang mga kwalipikadong empleyado.
Subay sa Labor Advisory No. 21, Series of 2026, giklaro sa ahensya nga ang tanang rank-and-file employees, bisan unsa pa ang ilang employment status ug pamaagi sa pagdawat sa sweldo, adunay katungod sa 13th month pay basta nakatrabaho og labing menos usa ka bulan.
Lakip niini ang mga empleyadong nag-resign o gitangtang sa trabaho, mga piece-rate workers ug mga nakagamit og maternity leave nga nakadawat og salary differential. Ang 13th month pay katumbas sa one-twelfth o 1/12 sa kinatibuk-ang basic salary nga nadawat sa empleyado sulod sa tibuok tuig.
Gimando usab nga ma-release ang maong benepisyo dili molapas sa Disyembre 24, 2026. Gipahinumdoman usab sa DOLE ang mga employer nga tumanon ang maong obligasyon aron masiguro nga madawat sa mga kwalipikadong mamumuo ang ilang angay nga benepisyo.
Photo courtesy: DOLE
