Pormal nang gipirmahan ang Memorandum of Agreement o MOA tali sa lokal nga kagamhanan ug Department of Agriculture – Regional Field Office XIII alang sa pagpatuman sa upat ka proyekto sa imprastraktura sa mga komunidad sa panguma sa Caraga.
Sumala ni Surigao del Norte Governor Robert Lyndon S. Barbers, tumong sa maong mga proyekto ang pagpaayo sa kahimtang sa mga karsada aron mas mapadali ang pagbiyahe sa mga mag-uuma ug pagdala sa ilang mga produkto ngadto sa merkado.
Lakip sa mga proyekto ang concreting sa Farm-to-Market Road gikan sa Barangay Banbanon padulong sa Barangay Diaz sa lungsod sa San Francisco, Anao-awon, ug ang road construction project sa Barangay San Pedro sa lungsod sa Alegria, Surigao del Norte.
Samtang sa dakbayan sa Surigao, lakip usab ang concreting sa Farm-to-Market Road gikan sa Barangay Danao padulong sa Mat-i, Phase III, ingon man ang concreting sa karsada gikan sa Barangay Cabongbongan hangtod sa Barangay Trinidad, Phase II.
Mitambong usab sa MOA signing sila Vice Governor Eddie Geed Gokiangkee Jr., Mayor Paul Dumlao II, Vice Mayor Alfonso Casurra, mga City Councilor Arnold Go ug Karl Duane Casurra, uban si Department of Agriculture Regional Director Ricardo M. Oñate Jr.
Pinaagi niini, gilauman nga mas mapalambo ang koneksiyon sa mga komunidad sa panguma, mapamenos ang kalisod sa transportasyon ug mas mapadali ang pagbaligya sa mga produkto sa mga mag-uuma.
