Napusasan ang upat ka lalaki, dihang nadakpan sa kapulisan nga nagpahigayon og ilegal nga pagmina sa bulawan sa Purok 8B, Barangay Tagabaca, Butuan City, pasado alas-5:45 sa hapon sa makalabayng adlaw.
Nasakpan ang mga suspek samtang nagproseso sa bulawan pinaagi sa flushing, diin gigamit ang water pump ug kusog nga presyur sa tubig aron mahugasan ug mabulag ang bulawan gikan sa balas, graba ug yuta.
Gipasanginlan ang upat ka lalaki nga nagmina nga walay permit o awtorisasyon gikan sa may katungdanang ahensya sa gobyerno. Tungod niini, atubangon sa mga dinakpan ang Section 8 sa Republic Act 7076, in relation to Sections 5 ug 6 sa DENR Administrative Order 2022-03, ug Section 103 sa Republic Act 7942.
Gipangunahan sa Butuan City Mobile Force Company ang maong operasyon, samtang ang upat ka dinakpan anaa na karon sa kustodiya sa Butuan City Police Station 4 alang sa tukmang proseso.
Photo courtesy: BCPS-4
