Angol ang duha ka trabahante sa usa ka lodging house, human gipamusil sa wala mailhing lalaki nga nagsul-ob og helmet, atol sa pagpangawat nga nahitabo pasado kahanihang ala 01:00 sa kadlawon, Nobyembre 11, 2026, sa dakbayan sa Butuan.
Giila ang mga biktima nga sila si Jomar Baldes ug Mayan Pal-ot, mga residente sa Barangay Mat-i, Las Nieves, Agusan del Norte.
Base sa inisyal nga impormasyon, gikan sa igsoon sa usa sa mga trabahante, kalit nga misulod sa maong lodging house ang usa ka lalaki nga nagsul-ob og helmet.
Pagpangawat ang gituohang motibo sa suspek human niini kuhaa ang cellphone sa usa sa mga biktima. Apan wala pa matino kung adunay laing mga butang o kantidad sa kuwarta nga nakuha.
Misulay pa og pakigbisog si Jomar batok sa suspek apan gipusil kini sa bahin sa ilok. Samtang si Mayan, nga gigukod pa sa suspek padulong sa gawas sa establisyemento, gipusil usab sa bahin sa tiyan.
Human sa pagpamusil, dali nga mikalagiw ang suspek sakay sa usa ka itom nga Honda Click nga motorsiklo pasdulong sa wala matino nga direksiyon.
Samtang, dali nga gidala sa Butuan Medical Center o BMC ang duha ka biktima alang sa medikal nga pag-atiman. Padayon pang gihimo sa kapulisan ang imbestigasyon aron mailhan ug madakpan ang responsable sa maong pagpamusil ug pagpangawat.
Photo courtesy:John Paul Consad
