Dakpan ang duha ka indibidwal sa hiniusang anti-illegal drug operation sa kapulisan sa Purok 12, Barangay Cambanogoy, Asuncion, Davao del Norte, ala 1:40 sa kaadlawon Nobyembre 10, 2026. Gipahigayon ang operasyon sa Asuncion Municipal Police Station (MPS) kauban ang Davao Norte Police Drug Enforcement Unit (DNPDEU), ubos sa pagpanguna ni PMAJ Delia Gesultura, ang Acting Chief of Police sa Asuncion MPS, ug direktang superbisyon ni PCOL Glenn G. Cristines, ang Provincial Director sa Davao Norte Police Provincial Office.
Giila ang mga nadakpan sa alyas nga “Dodong,” 25 anyos, residente sa Tagum City, ug alyas “May-May,” 26 anyos, residente sa Barangay New Bantayan, Asuncion. Narekober gikan sa mga suspek ang pito ka heat-sealed plastic sachets nga adunay puti nga kristal nga substansiya nga gituohang shabu. Lakip niini ang usa ka buy-bust item ug unom ka sachets nga giingong nakuha isip possession items.
Gibanabana nga walo ka gramos ang kinatibuk-ang gibug-aton sa nakumpiskang ilegal nga droga, nga mokabat sa 54 mil ug 400 pesos ang standard drug price niini.
Narekober usab sa operasyon ang duha ka sling bags, usa ka 500-peso bill nga gigamit sa operasyon, coin purse, ug Suzuki Raider 150 nga motorsiklo lakip ang yawe niini.
Sa pagkakaron, giandam na ang kasong paglapas sa Republic Act 9165 o Comprehensive Dangerous Drugs Act of 2002 batok sa duha ka suspek alang sa inquest proceedings sa Provincial Prosecution Office sa Tagum City.
Photo Courtesy: PNP DavNor Asuncion
