Nag-export ang Kapalong Cooperative og unom ka metrikong tonelada sa pinauga ug giprosesong cacao beans ngadto sa nasud New Zealand niadtong Hunyo 30, 2026. Kini ang gibutyag atol sa gipahigayon nga DTI DavNor Stakeholders’ Consultation ning adlaw nga Miyerkules, Nobyembre 11, 2026. Ang shipment nga gipadala pinaagi sa Panabo Port gipalit sa Rautini Ltd. ug nagkantidad og ₱2.1 milyon.
Sumala sa report, mao kini ang unang commercial shipment sa Philippine fermented cacao beans ngadto sa New Zealand. Nagpakita kini sa pag-uswag sa kooperatiba ngadto sa direktang pag-export sa high-value o specialty cacao sa internasyonal nga merkado.
Gilauman nga makahatag kini og mas dakong kita sa mga mag-uuma, makapalig-on sa ganansya sa kooperatiba ug makapadayon sa pagpauswag sa produksyon ug kalidad sa cacao sa Kapalong sa probinsya sa Davao del Norte.
