Nagpadayon ang lokal nga panggamhanan sa New Bataan, Davao de Oro sa pag-atiman ug pagpaayo sa mga dalan sa mga barangay pinaagi sa road gravelling ug road clearing operations.
Karong semanaha, gipadala ni Mayor Atty. Bianca Cualling Brua ang mga ekipo sa Barangay Kahayag alang sa pagbutang og graba sa dalan, samtang gipahigayon usab ang road clearing operations sa Kampo 2 ug 3 sa Barangay Andap.
Tumong sa maong mga kalihukan nga masiguro ang mas hapsay ug luwas nga pagbiyahe sa mga residente, ilabina sa mga lugar nga nanginahanglan og pagpaayo ug paglimpyo sa mga agianan.
Gipasalamatan usab ang Municipal Engineering Office o MEO Motorpool sa ilang suporta ug paningkamot sa paghatag sa gikinahanglang mga ekipo aron mapadayon ang mga proyekto ug serbisyo sa nagkadaiyang barangay.
Pinaagi niini, gilauman nga mas mapalambo ang konektibidad sa mga komunidad ug mas mapadali ang paglihok sa mga residente ug mga sakyanan sa lungsod.
Photo courtesy: Municipality og New Bataan
