Gihatagan og ayuda sa agrikultura ang 239 ka mag-uuma sa lungsod sa Montevista human maapod-apod kanila ang mga liso sa humay ug abono ning bag-o lang.
Ang mga input sa pagpanguma gikan sa Department of Agriculture ubos sa National Rice Program, nga gipatuman pinaagi sa lokal nga panggamhanan ug Municipal Agriculture Office nga gipangulohan ni Acting Municipal Agriculturist Norelyn D. Lico.
Tumong sa maong ayuda nga maandam ang mga mag-uuma sa posibleng epekto sa El Niño, malikayan ang dakong kadaot sa mga pananom ug mapadayon ang produksyon sa humay.
Gipasiugda ni Mayor Cyrex Labrador Basalo ang kamahinungdanon sa paghatag og suporta sa sektor sa agrikultura aron mapalig-on ang panginabuhian sa mga mag-uuma ug ang suplay sa bugas sa lungsod.
