Giplano sa Bangko Sentral ng Pilipinas o BSP nga sugdan sa tuig 2027 ang lokal nga produksiyon sa polymer banknotes o mga perang papel nga hinimo sa polymer nga materyal. Tumong niini nga maminusan ang pagsalig sa mga langyaw nga supplier sa maong klase sa salapi.
Sumala kang BSP Deputy Governor Mamerto Tangonan, nag-andam na ang ahensya og linya sa production sa ilang Security Plant Complex sa Quezon City. Gilauman nga makahimo kini og hangtod 500 milyong piraso nga polymer banknotes matag tuig. Sa pagkakaron, nagasalig pa ang Pilipinas sa Australia alang sa paghimo niini.
Matod sa BSP, mas lig-on ug mas lisod pekeon ang polymer banknotes tungod sa mga security features niini. Gilauman usab nga molungtad kini hangtod pito ka tuig ug tunga, mas dugay kumpara sa ordinaryong papel nga banknotes.
Lakip sa polymer money nga gigamit sa Pilipinas ang 50, 100, 500 ug 1,000 pesos.
Photo courtesy: BSP
