Nikunhod ang Gross International Reserves (GIR) sa nasod ngadto sa $97.4 billion sa kataposan sa Oktubre, sumala sa preliminary data nga gipagawas sa Bangko Sentral ng Pilipinas (BSP).
Nagpakita kini og pag-ubos nga 2.2 porsiyento gikan sa $99.49 billion niadtong Setyembre, ug mas ubos usab og 11.7 porsiyento kung itandi sa $110.25 billion nga natala sa parehas nga bulan sa miaging tuig.
Gitudlo sa BSP ang nag-unang hinungdan sa maong pag-ubos mao ang net foreign exchange operations sa sentral nga bangko aron pugngan ang paspas nga pag-usab-usab sa bili sa peso, nga nitala og pinakaubos nga lebel sa intraday nga 64.2 batok sa dollar niadtong Oktubre 27. Nakadugang usab niini ang pagkunhod sa presyo sa bulawan sa merkado ug ang pagkuha sa nasyonal nga kagamhanan og dollar reserves aron ibayad sa mga utang sa gawas sa nasod.
Bisan pa man niini, gipadayag sa BSP nga nagpabilin gihapon nga sakto ang pondo sa nasod batok sa mga shock gikan sa gawas sa nasod. Ang kasamtangang lebel sa GIR makatabon pa sa 6.1 ka bulan nga balor sa mga imported nga baligya ug serbisyo, ug katugbang usab sa 3.1 ka pilo sa short-term external debt sa Pilipinas nga kinahanglang bayran sulod sa usa ka tuig.
Photo courtesy: BSP
