Nakakuha na usab ug dugang dungog ang lungsod sa Sumilao, Bukidnon human opisyal gitunolan sa National Honor Award—ang pinakataas nga pasidungog sa natad sa nutrisyon sa tibuok Pilipinas atol sa 2026 National Nutrition Awarding Ceremony niadtong Nobyembre 6, 2026, agi’g pag-ila sa unom ka tuig nga sunod-sunod nga kalampusan sa munisipyo sa pagpatuman sa mga programa alang sa maayong panglawas sa katawhan.
Gipangulohan ni Mayor Venice Marie P. Villo ang pagdawat sa maong pasidungog alang sa tibuok munisipyo, diin iyang gipahinungod ang kadaugan sa tanang Sumilaonon. Nagpadayag usab ang pamunoan sa dakong pasalamat sa Municipal Nutrition Team nga gipangulohan ni Winna Beñas, kauban sila si Rasheil ug Claricel,sa Rural Health Unit (RHU) sa pamunoan ni Doc Elvs, ug sa tibuok pamilya sa LGU Sumilao.
Gipasidunggan usab ang sakripisyo sa mga Barangay Nutrition Scholars (BNS), barangay officials, ug community volunteers nga walay kapoy nga nagbalay-balay sa pagmonitor sa kahimtang sa mga pamilya ug kabataan.
Sa panagtambayayong sa National Nutrition Council (NNC), ang maong nasyonal nga award nagsilbing bunga sa pila ka tuig nga pagpaningkamot, sakripisyo, ug dedikasyon sa lungsod Sumilao sa pagpauswag sa kalidad sa kinabuhi ug seguridad sa nutrisyon sa matag katawhan sa lungsod.
Photo courtesy: Venice “Nice” Villo
