Balhog sa prisohan ang usa ka lalaki human nadakpan sa mga otoridad atol sa gilusad nga operasyon didto sa Sitio Limot, Barangay Binondo, Baganga, Davao Oriental niadtong milabay nga adlaw.
Ang operasyon gihimo sa mga personahe sa Baganga Municipal Police Station, kaubanan ang 1st Davao Oriental Provincial Mobile Force Company ug Regional Mobile Force Battalion 5 nga nagresulta sa pagkasikop sa wanted person.
Ang suspek nadakpan pinaagi na sa pagpatuman sa warrant of arrest alang sa kasong Qualified Theft, ubos sa Criminal Case No. 76,308-13 nga giisyu sa Acting Presiding Judge sa Regional Trial Court, 11th Judicial Region, Branch 14, Davao City penitsahan niadtong Hunyo 27, 2014 nga adunay pyansang girekomendar nga mukabat sa ₱80,000.00.
Sa pagkakaron ang dinakpan anaa na sa kustodiya sa Baganga Municipal Police Station alang sa tukmang disposisyon ug dugang mga proseso atubangan sa korte.
Photo courtesy: Baganga MPS
