Mikabat sa 98 ka mga batan-on ang nakahuman sa tulo ka adlaw nga 5th Municipal Youth Peace Camp 2026 nga gipahigayon sa Youth for Peace Movement – Monkayo Chapter ug gitapos pinaagi sa culmination program niadtong Nobyembre 8 sa Tubo-Tubo National High School Monkayo Davao De Oro.
Gidala sa maong kalihokan ang panawagan nga “Peace We Love, Peace We Live, Peace We Advocate,” nga nagtumong sa pagdasig sa kabatan-onan nga mahimong aktibong tigpasiugda ug kaabag sa pagpalambo sa kalinaw sa ilang tagsa-tagsa ka komunidad.
Gisuportahan ang maong kalihokan sa lokal nga pangagamhanan sa Monkayo ubos sa pagpangulo ni Mayor Manuel Jayr N. Zamora Jr., nga girepresentahan ni SB Member Bienvenido Esguerra Jr.
Mitambong usab ang mga representante sa 25th Infantry Battalion nga gipangulohan ni LTC Mark Serapion L. Lagud Jr., INF (GSC), PA, SKMF President Dan Mark Martinez, Kapitana Analyn Enungan, SK Chairperson Jayne Kristeen Gay Alcala, ug mga representante sa Youth and Sports Division ug Tubo-Tubo National High School.
Gipasiugda sa kalihokan ang papel sa kabatan-onan sa pagpalig-on sa panaghiusa ug pagmintinar sa malinawon nga komunidad.
