Nakasakmit og duha ka importanteng pasidungog ang Municipal Health Office sa lokal nga panggamhanan sa Baganga gikan sa Department of Health (DOH) atol sa Pasidungog 2026 nga gipahigayon sa Davao City.
Lakip sa mga pasidungog nga nadawat ang Indak Kalusugan Bronze Award, isip pag-ila sa epektibo ug hapsay nga pagpadagan sa Municipal Epidemiologic Surveillance Unit ug ang Indak Kaunlaran Award tungod sa tukma sa panahon ug episyenteng pag-liquidate sa mga pondo nga gigahin alang sa mga programa sa panglawas.
Gipasiugda nga ang maong kalampusan resulta sa hiniusang paningkamot sa lokal nga panggamhanan ug sa mga kawani sa Municipal Health Office sa padayon nga pagpatuman sa mga programa ug serbisyo nga nagtumong sa pagpauswag sa kahimtang sa panglawas sa mga lumulupyo sa tibuok munisipyo.
Samtang mipasalig usab ang lokal nga panggamhanan sa Baganga nga magpadayon ang pagpalig-on ug pagpalapad sa mga programa ug serbisyo, ilabina sa sektor sa panglawas aron masiguro ang hapsay, episyente ug dekalidad nga serbisyo medikal alang sa katawhan.
Photo courtesy: LGU Baganga
