Gipahinumdoman sa Municipal Agriculturist Office sa Local Government Unit sa Ipil ang tanang fur parents nga nakarehistro alang sa Libreng Ligate Program nga sundon ang gitakdang petsa sa pagdala sa ilang mga alagang hayop aron masiguro ang hapsay nga pagpatuman sa maong kalihokan.
Sumala sa pahibalo, karong Nobyembre 12, Huwebes, igahin ang libreng ligate alang sa mga iro, samtang sa Nobyembre 13, Biyernes, alang na usab kini sa mga iring. Gihimo ang maong kalihokan sa Bong Go Court, Ipil Government Complex, Barangay Taway.
Gihangyo usab ang mga tag-iya sa mga hayop nga siguruhon ang hustong pagpangandam sa ilang mga alaga sa dili pa ipailalom sa operasyon ug sundon ang tanang instruksyon sa veterinary team, lakip na ang mga pahimangno human sa pagligate aron malikayan ang posibleng komplikasyon ug masiguro ang maayong kahimtang sa mga hayop.
Samtang, gipahibalo sa Municipal Agriculturist Office nga nagpadayon pa ang online registration alang sa mga wala pa makaapil sa programa ug abli usab ang walk-in registration. Mahimong kontakon si Divine Salacao sa MAO alang sa dugang impormasyon kabahin sa pagparehistro.
Ang maong inisyatibo gihimo sa LGU Ipil sa pakigtambayayong sa Biyaya Animal Care Foundation isip kabahin sa pagpalambo sa responsableng pag-atiman sa mga alagang hayop ug pagkontrol sa nagkadaghang populasyon sa mga iro ug iring sa lungsod.
