Gipasiugda ang pagpalig-on sa suporta ug proteksyon alang sa mga Barangay Health Workers o BHWs atol sa deliberasyon sa Committee on Interior and Local Government kalabot sa gisugyot nga Magna Carta for Barangay Health Workers.
Atol sa maong deliberasyon, nakigpulong usab ang mga opisyal kang Pres. Khonan Cerial, presidente sa National Federation of Barangay Health Workers, aron hisgutan ang mga panginahanglan ug kaayohan sa mga BHW nga nagserbisyo sa nagkalain-laing komunidad.
Gipahigayon usab ang usa ka produktibong tigum uban kang Dr. Maria Lourdes Gajitos, Chief sa Health Systems Monitoring and Evaluation Division sa BLHSD, ug Maria Teresa Santiago, Senior Health Program Officer ug National BHW Focal Point Person sa DOH Bureau of Local Health Systems Development, alang sa dugang nga paghisgot sa mga lakang ug inisyatibo nga makapalig-on sa suporta alang sa mga health workers.
Gipasiugda sa maong paningkamot nga ang pag-atiman ug paghatag og igong suporta sa mga health workers usa usab ka paagi sa pagpalig-on sa sistema sa panglawas sa nasud, ilabina kay ang mga BHW maoy nag-unang nagserbisyo ug naghatag og tabang panglawas sa matag komunidad.
Padayon usab ang panawagan nga mahatagan ang mga Barangay Health Workers og mas lig-on nga proteksyon, igong suporta ug pag-ila sa ilang dakong kontribusyon sa pag-atiman sa panglawas ug kaayohan sa katawhan.
