Gipalig-on sa Council for the Welfare of Children (CWC) ug Department of the Interior and Local Government (DILG) ang mas hugot nga pagpatuman sa mga balaod nga nagtumong sa pagpanalipod sa mga kabataan kalabot sa pagpang-abuso, pagpahimulos ug sayo nga kaminyoon.
Kabahin kini sa selebrasyon sa National Children’s Month diin gipunting ang kahinungdanon sa Child Protection in Emergency, ilabina sa pag-andam sa mga bata panahon sa kalamidad ug uban pang krisis.
Naghatag usab ang CWC og teknikal nga tabang sa mga lokal nga panggamhanan aron mapalig-on ang ilang mga programa ug plano alang sa kaluwasan sa mga kabataan ubos sa Children’s Emergency Relief and Protection Act.
Padayon ang pagmonitor ug paghatag og pasidungog sa mga lokal nga panggamhanan nga nagpatuman og mga programa alang sa mga bata, diin lakip ang Iligan City nga nakadawat na usab og ikaduhang pasidungog isip child-friendly nga LGU.
Nanawagan ang LGU-Iligan sa publiko ug kapulisan nga magtinabangay sa pagpanalipod sa mga kabataan batok sa bisan unsang matang sa pagpang-abuso, ilabina panahon sa emerhensya.
