Nangayo og tabang ang Tantangan Municipal Police Station sa publiko aron mailhan ang usa ka lalaki nga namatay human maaksidente sa motorsiklo sa Purok Bagong Sikat, Barangay Maibo, Tantangan, South Cotabato.
Base sa report, nahitabo ang self-accident pasado alas-2:25 sa kaadlawon diin ang biktima maoy nagmaneho sa usa ka itom nga Bajaj motorcycle nga may plakang M3357H.
Sa pagkakaron, wala pa mailhi ang identidad sa namatay nga lalaki nga nagsul-ob og pula nga long sleeves ug pula nga shorts. Ang patayng lawas niini anaa karon sa morgue sa South Cotabato Provincial Hospital samtang gihulat ang pag-ila ug pagkuha sa iyang pamilya.
Giawhag ang bisan kinsa nga adunay impormasyon o nakaila sa biktima nga moduol o mokontak sa Tantangan Municipal Police Station aron matabangan ang mga awtoridad sa pag-ila niini ug maangkon na sa iyang pamilya ang iyang patayng lawas.
Photo courtesy: Tantangan Municipal Police Station|fb page
