Mikunhod og 0.29 porsiyento ang kinatibuk-ang ihap sa mga rehistradong negosyo sa General Santos City karong 2026, samtang misaka ang gidaghanon sa mga negosyong nag-renew sa ilang business permits.
Base sa 2026 Annual Data Review sa Business Permits and Licensing Division o BPLD, mikabat sa 13,706 ang rehistradong negosyo karong tuiga, ubos sa 13,746 nga natala niadtong 2025.
Sa report nga gipresentar atol sa Regular Session sa Sangguniang Panlungsod niadtong Nobyembre 10, misaka og 4.37 porsiyento ang business permit renewals, gikan sa 11,999 niadtong 2025 ngadto sa 12,523 karong 2026.
Apan dako ang pagkunhod sa mga bag-ong negosyong narehistro sa siyudad nga miabot sa 32.28 porsiyento, gikan sa 1,747 niadtong miaging tuig ngadto sa 1,183 karong tuiga.
Nagpakita kini nga misaka ang gidaghanon sa mga nagpadayon nga negosyo nga nag-renew sa ilang permits, apan mikunhod ang mga bag-ong negosyo nga misulod sa merkado sa siyudad.
Ang datos gibase sa BPLD Annual Data Review nga gi-update niadtong Nobyembre 9, 2026.
