Arestado ang duha ka lalaki human nasikop sa hiniusa nga operasyon sa kapulisan ug maritime authorities ang usa ka truck nga nagkarga og 1,450 ka kilo sa gidudahang sodium cyanide sa Sitio Tampuan, Barangay Kamanga, Maasim, Sarangani Province, pasado alas-12:30 sa kadlawon karong Nobyembre 11.
Narekober gikan sa truck nga may plakang KBF 1148 ang 29 ka sako sa gidudahang sodium cyanide nga gibanabanang nagkantidad og 1.74 milyon pesos. Giila ang mga dinakpan sa alyas nga Ramon, 31 anyos, ang drayber, ug alyas Dante, 59 anyos, ang helper. Pareho silang residente sa Pantukan, Davao de Oro.
Ang operasyon gipahigayon sa Maasim Maritime Law Enforcement Team, Maasim Municipal Police Station ug Regional Maritime Unit 12.
Samtang, temporaryong gitugyan sa Municipal Environment and Natural Resources Office o MENRO sa Maasim ang mga nakumpiskang kemikal samtang gihulat ang pag-refer niini sa DENR-EMB 12 alang sa pagsusi ug hustong disposisyon.
Anaa na sa kustodiya sa Maasim MLET ang duha ka dinakpan samtang giandam ang tukmang mga kasong ipasaka batok kanila.
Photo courtesy:Police Regional Office 12
